Ned Prays : Rusiya bioloji silahlar hazırlayır

Bioloji silahlar sinfi təbiətdə tapılan və insanları öldürmək və ya zərər vermək üçün istifadə oluna bilən hər hansı mikroorqanizmlərə və ya toksinlərə aiddir. Rusiya Bioloji Silahlar Konvensiyasının müddəalarına zidd olaraq bioloji silahlar hazırlamağa davam edir.

Bu barədə ABŞ Dövlət Departamentinin sözçüsü Ned Prays brifinqdə deyib. “Birləşmiş Ştatlar hesab edir ki, Rusiya Bioloji Silahlar Konvensiyasından irəli gələn öhdəlikləri pozaraq hücum xarakterli bioloji silah proqramını dəstəkləməkdə davam edir”, - deyə ABŞ Dövlət Departamentinin sözçüsü bildirib.

O həmçinin qeyd edib ki, Rusiya bu məsələdə diqqəti özündən yayındırmağa cəhd edir. Ned Praysın sözlərinə görə, rusiyalı təbliğatçılar uzun illərdir ki, Ukrayna ərazisində bioloji silah laboratoriyaları haqqında yalan məlumat yayırlar.

“Rəsmi Moskva hərbi təcavüzünə haqq qazandırmağa çalışır. Bu məqsədlə Kremlin nəzarətində olan media, Rusiya kəşfiyyatına bağlı informasiya saytları və qondarma ekspertlər cəlb olunub. Bu qurumlar bir-birini təkrarlayan çoxlu sayda səs illüziyasını yaratmaq məqsədilə daim, damla-damla, informasiya mühitini yalan hekayələrlə doldurmaq üçün birlikdə işləyirlər”, - deyə Ned Prays bildirib.