Odessa vuruldu, 14 nəfər yaralandı

Rusiya Ordusunun gecə saatlarında Ukraynanın Odessa şəhərinə dron hücumu nəticəsində 14 nəfər xəsarət alıb.

Bu barədə Ukrayna mediası məlumat yayıb.

Zərbələr nəticəsində yaşayış binaları, mehmanxana, fərdi tikili, nəqliyyat vasitələri və obyektlər zədələnib. Zərərçəkənlərdən ikisinin uşaq olduğu bildirilir.

Rusiya qoşunları aprelin 27-nə keçən gecə Ukrayna dəniz dəhlizi ilə Nauru bayrağı altında üzən "RAMCO" ticarət gəmisinə hücum edib.

Ukrayna Dəniz Limanları Administrasiyasının "Telegram" kanalı məlumat yayıb ki, gəmi yüngül zədələnib. Göyərtədəki yanğın ekipaj tərəfindən operativ şəkildə söndürülüb. İlkin məlumata görə, xəsarətalan yoxdur.

Bildirilib ki, həmin gecə Rusiya qüvvələri Odessanın liman infrastrukturuna və Ukrayna dəniz dəhlizinin işini təmin edən obyektlərə növbəti zərbələr endirib.

Hücum nəticəsində yük terminalının ərazisindəki enerji obyekti zədələnib və lokal yanğınlar baş verib. Yanğınlar müvafiq xidmətlər tərəfindən operativ şəkildə söndürülüb.

"Ukrayna limanlarına hər gün edilən hücumlar beynəlxalq gəmiçiliyin təhlükəsizliyinə və qlobal ərzaq sabitliyinə birbaşa təhdiddir. Sistemli təzyiqə baxmayaraq, Ukrayna dəniz dəhlizi fəaliyyətini davam etdirir", – deyə Ukrayna Dəniz Limanları Administrasiyasından əlavə ediblər.