Orban eskalasiyaya yol verməməyə çağırdı

Beynəlxalq vəziyyətin kəskinləşməsi Üçüncü Dünya müharibəsinə çevrilə biləcək qlobal münaqişə ehtimalını artırır.

Bunu Macarıstanın Baş naziri Viktor Orban bildirib.

O vurğulayıb ki, Donald Trampın ABŞ Prezidenti seçilməsindən sonra qlobal münaqişə ehtimalı azalsa da, tamamilə aradan qalxmayıb.

“Gərginliyin artmasına səbəb olan amillər arasında beynəlxalq münaqişələrin sayının artmasını, silahlanma yarışını, ticarət məhdudiyyətlərinin və iqtisadi sanksiyaların güclənməsini, dünyanın hərbi bloklara bölünməsini və kasıb ölkələrdən daha inkişaf etmiş regionlara miqrasiyanın artmasını göstərmək olar”, − deyə Baş nazir qeyd edib.

Viktor Orban əmindir ki, NATO ilə Rusiya arasında hər hansı silahlı münaqişənin baş verməsi Üçüncü Dünya müharibəsinə gətirib çıxaracaq. O belə bir eskalasiyaya yol verməməyə çağırıb.