Pakistanda təbii fəlakət | Ölənlərin sayı açıqlandı

Pakistanın müxtəlif bölgələrində 4 gündür davam edən güclü yağışlar səbəbindən ölənlərin sayı 65-ə çatıb. Onlardan 28-i ildırım vurması nəticəsində həyatını itirib.

Yağışların normadan 2 dəfə çox olduğu ölkənin şimal-qərbində azı 32 ölü və 40-dan çox yaralının olduğu bildirilib. Bölgədə 1,3 mindən çox ev dağılıb, evsiz sakinlər müvəqqəti sığınacaqlara yerləşdirilib.

Uzun sürən yağışlar bəzi şəhərlərdə də normal həyatı pozub. Yüzlərlə evə ziyan dəyib, yaşayış məntəqələri və yollar su altında qalıb, ictimai nəqliyyat dayanıb, elektrik enerjisi kəsilib.

Bəlucistan hakimiyyəti əyalətdə fövqəladə vəziyyət elan edib və zərərçəkənlərə yardım göstərmək, güclü yağışların vurduğu ziyanı aradan qaldırmaq üçün təcili tədbirlər görür.