Paşinyan səhv etdi, Rusiya özündən çıxdı

“Kreml istəməzdi ki, Vladimir Putin nə vaxtsa Ermənistana səfərdən imtina etməli olsun”.

Bunu Kremlin rəsmi nümayəndəsi Dmitri Peskov Ermənistan parlamentinin oktyabrın 3-də Beynəlxalq Cinayət Məhkəməsinin Roma Statutunu ratifikasiya etməsinə münasibət bildirərkən deyib.

O, Kremlin Ermənistanın bu addımını ikitərəfli münasibətlər baxımından yanlış addım hesab etdiyini söyləyib.

Peskov vurğulayıb ki, Rusiya Ermənistan xalqını qardaş hesab edir, lakin Moskvanın bu ölkənin rəhbərliyinə sualları var.

Peskov əlavə edib ki, Moskva İrəvanın müttəfiqlik və Kollektiv Təhlükəsizlik Müqaviləsi Təşkilatının mexanizmlərinin guya Ermənistanı qorumaq üçün yetərli olmadığı barədə ittihamlarını da rədd edir. O bildirib ki, baş nazirin iddiaları reallığa uyğun gəlmir.

“Ermənistanın KTMT və Moskva ilə müttəfiqlik mexanizmlərindən başqa yaxşı heç nəyi yoxdur. Rusiya və KTMT ilə əməkdaşlıq Ermənistanın təhlükəsizliyinə tam zəmanət verir”, – deyə Peskov vurğulayıb.

Kremlin rəsmi nümayəndəsi əlavə edib ki, Ermənistanın Baş nazirinin bütün ittihamlarına baxmayaraq, Rusiyanın Qarabağ ermənilərinə ürəyi yanır və humanitar yardım göstərməyə davam edir.