Pentaqon Yaxın Şərqdə 50-dən çox qırıcı təyyarə göndərib

ABŞ İranla danışıqlarda bir sıra "qırmızı xət"lər müəyyən edib.

Bunu ABŞ-nin vitse-prezidenti Cey Di Vens "Fox News" telekanalına müsahibəsi zamanı bildirib.

"ABŞ-nin müəyyən qırmızı xətləri var. Burada əsas marağımız İranın nüvə silahı əldə etməsinin qarşısını almaqdır. Biz nüvə silahının yayılmasını istəmirik. Əgər İran nüvə silahı əldə edərsə, onlardan sonra bəziləri dost, bəziləri o qədər də dost olmayan nüvə silahı əldə etmək istəyən çoxsaylı tərəflər olacaq. Bu, ABŞ xalqı üçün fəlakətli olardı", – deyə Vens bildirib.

Vitse-prezidentin sözlərinə görə, ABŞ Cenevrə danışıqlarından sonra da İranla bağlı istənilən addımı atmaq imkanını saxlayır.

“İndi Prezidentin dediyi kimi, bunu söhbət və diplomatik danışıqlar yolu ilə həll etməyi çox istərdik. Amma Prezidentin masasında bütün variantlar var”, – deyə Vens əlavə edib.

O, Cenevrədə danışıqlarının yaxşı keçdiyini deyərək, tərəflərin növbəti görüşə razılıq verdiyini bildirib.

Bundan əvvəl "Axios" portalı məlumat yaymışdı ki, Pentaqon son 24 saat ərzində Yaxın Şərqə 50-dən çox "F-35", "F-22" və "F-16" qırıcılarını göndərib.