Pezeşkianın çıxışına sabiq nazirdən sərt reaksiya | Bu, millətə zərər vuracaq

İran Prezidenti Məsud Pezeşkianın Novruz bayramı çərçivəsində Qərbi Azərbaycan əyalətinin mərkəzi olan Urmiya şəhərinə səfəri zamanı Azərbaycan türkcəsində çıxış etməsi sabiq yol və şəhərsalma naziri Abbas Axundinin reaksiyasına səbəb olub.

“ArazNews” “Telegram” kanalı bildirir ki, A.Axundi bu barədə öz sosial media paylaşımında qeyd edib:

“Cənab M.Pezeşkian, anlayıram ki, siz Urmiyada böyümüsünüz və beş dönəm Təbrizin hörmətli millət vəkili olmusunuz. Ona görə də türkcə hesabat almaq sizin üçün tamamilə adi və təbiidir. Amma hazırda siz ölkənin Prezidentisiniz. Rəsmi tədbirlərdə yalnız dövlət dili olan farsca danışmalı və hesabat almalısınız. Bu məsələyə diqqətsizlik sonda millətə zərər vuracaq. Zəhmət olmasa, diqqətli olun”.

Prezident M.Pezeşkianın türk dilindən istifadəsi Güney Azərbaycanda müsbət qarşılanarkən, bəzi fars siyasi çevrələrində narahatlıq yaradıb. A.Axundinin bu çıxışı isə ictimaiyyət arasında geniş müzakirələrə səbəb olub.

M.Pezeşkianın türkcə danışması bundan əvvəl də fars milliyyətçi çevrələrin narazılığına səbəb olmuşdu.

Maraqlıdır ki, Məsud Pezeşkianın başqa dillərdə danışması heç bir etiraza səbəb olmur, lakin o, türkcə danışdığı zaman dərhal tənqid hədəfinə çevrilir və ölkənin sabitliyinə təhlükə yarada biləcəyi ilə bağlı narahatlıqlar səsləndirilir.