Putin axtardığı hər şeyi onda tapdı | Belousovun seçilməsinin əsl səbəbi

Rusiya Prezidenti Vladimir Putin yeni müdafiə naziri kimi Kremlin ən istedadlı iqtisadçısı adlandırılan Andrey Belousovu seçib və onun üçün aydın missiya müəyyən edib: Ukraynada qələbə qazanmaq və Moskvanı NATO-ya qarşı uzunmüddətli münaqişəyə hazırlamaq.

Bu barədə “Teleqraf” məlumat yayıb.

Nəşr bildirib ki, ilk baxışdan A.Belousov Rusiya müdafiə nazirinin qəlibinə sığmır:

“Cədvəllərdəki şücaəti və Keyns iqtisadiyyatını başa düşməsi ilə tanınan A.Belousov tanklardan daha çox məlumat sütunları ilə işləməkdə mahirdir. Lakin V.Putin Kremlin ən istedadlı və qeyri-liberal iqtisadçısı kimi təsvir edilən cənab A.Belousovu seçib və ona aydın bir missiya tapşırıb: Ukraynada qələbə, həmçinin ölkəni NATO-ya qarşı uzunmüddətli münaqişəyə hazırlamaq.

V.Putin bu layihələri Rusiya lideri kimi öz mirası üçün mərkəzi hesab edir və bu vəzifəyə hərbçi yox, bürokratın təyin olunmasını istəyirdi. Əvvəlki müdafiə naziri Sergey Şoyqu Rusiyanın hərbi səylərinə xələl gətirən bürokratik ətalətin öhdəsindən gələ bilməməsinə görə tənqid edilib. V.Putinə sadiq olan A.Belousov kəskin analitik ağlı və rəqəmlərə meyli ilə tanınır.

Rusiya Prezidenti iqtisadiyyatı və cəmiyyəti müharibə vəziyyətinə keçirib. Bu ölkədə müharibə normaya çevrilib. İqtisadçının müdafiə naziri təyin edilməsi isə bu zehni dəyişikliyi vurğulayır. A.Belousov S.Şoyqudan çox fərqli rəqəm yönümlü bir yanaşma tutacaq. Yeni təyin olunmuş nazir yuxarıya doğru səssizcə “sürünüb”.

2012-ci ildən o, iqtisadi inkişaf naziri, daha sonra V.Putinin iqtisadi müşaviri, sonra isə Baş nazirin müavini olub. Kreml komandasına qoşulmazdan əvvəl A.Belousov Ticarət Nazirliyində analitik, sonra isə Baş nazirin Aparatında maliyyə direktoru vəzifəsində çalışıb. Bu rezüme darıxdırıcı görünə bilər, lakin V.Putinin axtardığı təcrübə də məhz budur”.

Qeyd olunur ki, Ukraynadakı müharibə dağıdıcı müharibəyə çevrilib və V.Putinin fikrincə, o, qalib gələ bilər:

“Rusiya Prezidenti Şimali Koreya və İranla silah tədarükü müqavilələri imzalayıb, mülki sənayeni silah istehsalına keçirib, həmçinin yüz minlərlə insanın, o cümlədən məhkumların səfərbər olmasına təkan verib. Bu, Rusiyaya Ukraynada maddi üstünlük qazandıraraq, gündə təxminən 1000 itkini kompensasiya etməyə imkan yaratdı. Başqa sözlə, V.Putin Ukraynada kəmiyyətin keyfiyyətdən üstün olacağına inanır”.