Putin-Tramp görüşündən çox Lavrovdan danışıldı | Alyaskada diqqətçəkən məqam

Alyaskada keçirilən görüş zamanı Rusiya xarici işlər naziri Sergey Lavrovun üzərində “SSRİ” yazısı olan sviter geyinməsi həm yerli, həm də beynəlxalq medianın əsas müzakirə mövzusuna çevrildi.

Lavrov məsələ ilə bağlı “NBC News”a açıqlamasında bildirib ki, bu geyim Sovet İttifaqının bərpası niyyətini ifadə etmir:

“Biz Sovet İttifaqında doğulmuşuq. Vladimir Putin dəfələrlə deyib: kim SSRİ-nin dağılmasına görə təəssüflənmirsə, onun ürəyi yoxdur, kim isə onun bərpasını istəyirsə, onun başı yoxdur. Bu, tamamilə düzgün fikirdir”.

Lavrovun geyindiyi sviter sosial şəbəkələrdə minlərlə şərh doğurub. Bir çoxları bunu Moskvadan gizli siyasi mesaj kimi dəyərləndirsə də, digərləri sadəcə nostalji element olduğunu vurğulayır.

ABŞ mediasında isə əsas sual bu olub: niyə məhz Alyaska kimi simvolik məkanda belə bir geyimlə çıxış etmək seçildi?

Rusiya – Ukrayna müharibəsi, planetar təhlükəsizlik, enerji siyasəti və sanksiyaların müzakirə olunduğu görüşdə diqqətlərin “SSRİ sviteri” üzərində cəmlənməsi bir daha göstərdi ki, beynəlxalq siyasətdə bəzən bir simvol, bir geyim seçimi belə rəsmi gündəliyi kölgədə qoya və bütün diqqəti üzərinə çəkə bilir.