Putindən Ukraynaya sərt mesaj | Sənədlərə imza atmayacağıq

Rusiya Prezidenti Vladimir Putin Çin Xalq Respublikasında rəsmi səfərdədir.

Mayın 17-də Pekində jurnalistlərin suallarını cavablandıran Rusiyanın dövlət başçısı Ukraynada hərbi əməliyyatlarla bağlı bir sıra açıqlamalar verib.

O bildirib ki, aqressiya nümayiş etdirən, danışıqlardan yayınan, problemin həllini Qərbdə axtaran tərəf Kiyevdir.

V.Putinin Volodimir Zelenskinin legitimliyi ilə bağlı suala cavabı isə belə olub:

“Biz hər şeyi analiz edirik. Ukraynadakı münaqişənin kəskin fazasına qədər Prezident Volodimir Zelenski ilə daim əlaqə saxlamışıq. Legitimlik məsələsinə gəlincə isə bildirmək istəyirəm ki, bu suala Ukraynanın hüquqi və siyasi sistemi, o cümlədən Konstitusiya Məhkəməsi cavab verməlidir. Bizim üçün V.Zelenskinin legitimliyi məsələsi olduqca vacibdir. Taleyüklü sənədlər qanuni orqanlar tərəfindən imzalanmalıdır.

Amma buna baxmayaraq, Rusiya Federasiyası Ukrayna üzrə sülh danışıqlarında iştirak etməyə hazırdır. Qarşı tərəfdən fərqli olaraq biz danışıqlardan heç bir zaman boyun qaçırmamışıq. Onlar sona qədər savaşacağıq deyirlər. Sona qədər dedikdə yəqin ki, sonuncu sağ qalan ukraynalını nəzərdə tutublar. İsveçrədə görüş planlaşdırırlar, fərqli ölkələrin iştirakı ilə. Amma bizi dəvət etməyiblər.

Biz olmadan hansı problemi həll edə bilərlər görəsən? Onlar istəyirlər ki, özləri otursun, özləri danışıqlar aparıb, özləri də qərar qəbul etsinlər. Sonra da rəsmi Moskvaya sənədləri uzadıb, “Putin bunu imzala” desinlər. Belə bir şey olmayacaq. Mümkünsüzdür”.

Çıxışının sonunda Vladimir Putin həmçinin bildirib ki, Rusiya hazırda Xarkovu ələ keçirməyi planlaşdırmır.

“Ölkəmizin Silahlı Qüvvələri tərəfindən Xarkovda həyata keçirilən hərbi əməliyyatlar ərazilərimizin atəşə tutulmasına cavab olaraq sanitar zonalar yaratmaq üçün icra edilib”, – deyə Rusiya Prezidenti bildirib.