Qaaninin Nəsrullahın qətlə yetirilməsində əli var? - Gizli məlumatlar sızdırıldı

İran İslam İnqilabı Keşikçiləri Korpusunun Qüds Qüvvələrinin komandanı general İsmayıl Qaaninin aqibəti müəmmalı olaraq qalır.

Kimisi onun İsrailin Beyruta endirdiyi aviazərbələr nəticəsində öldürüldüyünü, kimisi yaralı olduğunu bildirir. İran tərəfi isə İ.Qaaninin sağ olması ilə bağlı açıqlama yayıb.

Qeyd edək ki, Qərb mediası generalın elə öz ölkəsində dövlətə xəyanətdə ittiham olunaraq kəşfiyyat xarakterli ikili oyun apardığına görə dindirildiyi versiyasını irəli sürdü. İndi də mediaya yeni sensasiyalı xəbər sızıb.

“Sky News Arabia” İran mənbələrinə istinadən yazıb ki, SEPAH-ın Qüds qanadının komandanı İsmayıl Qaani infarkt keçirib və xəstəxanaya yerləşdirilib.

Məlumata görə, bu, “Hizbullah” lideri Həsən Nəsrullahın öldürülməsindən sonra İ.Qaaninin İsraillə əlaqəsi şübhəsi ilə bağlı aparılan istintaq çərçivəsində dindirilmə zamanı baş verib.

Xəbər agentliyi qeyd edib ki, İ.Qaani İsrailin Beyruta hücumlarında yaralanmayıb və hazırda İranın ali rəhbəri Əli Xameneyinin yaxın adamlarının nəzarəti altındadır. Bu məlumatın hələ ki nə təsdiqi, nə də təkzibi səslənib.