Qara dənizdəki Tuapse limanını alov bürüdü

Ukrayna Silahlı Qüvvələri ilhaq olunmuş Krımda Rusiya Hərbi Dəniz Donanmasının ümumi dəyəri təxminən 150 milyon dollar olan iki desant gəmisini vurub.

Ölkənin Müdafiə Nazirliyinin Baş Kəşfiyyat İdarəsinin məlumatına görə, aprelin 18-dən 19-na keçən gecə Baş Kəşfiyyat İdarəsinin xüsusi bölməsinin döyüşçüləri Rusiya Qara Dəniz Donanmasının Sevastopol buxtasında olan gəmilərinə zərbələr endiriblər. Nəticədə hər iki gəmi sıradan çıxıb.

Ukrayna kəşfiyyatının məlumatına görə, gəmilərdən birinin dəyəri 80 milyon dollar, digərinin isə 70 milyon dollardan çoxdur. Bundan başqa, işğal olunmuş Sevastopolda təxmini dəyəri 5 milyon dollar olan “Podlyot-K1” radiolokasiya stansiyası da məhv edilib.

Rusiyanın Qara dənizdəki Tuapse limanına Ukraynanın hücumu nəticəsində yanğın baş verib və ən azı bir nəfər ölüb. Bu barədə Rusiya rəsmiləri bildiriblər.

Rusiyanın əsas cənub limanlarından biri olan Tuapse neft məhsullarının ixrac mərkəzidir, həmçinin kömür və gübrə kimi yük daşımalarını həyata keçirir. Bundan əlavə, burada “Rosneft” şirkətinə məxsus eyniadlı böyük neft emalı zavodu yerləşir.