Qəribə olan təkcə görünüşü deyil | Antarktidadakı donmayan “qanlı şəlalə”nin sirri açıldı?

Antarktidanın dərinliklərində alimləri və tədqiqatçıları illərdir təəccübləndirən unikal bir təbiət möcüzəsi yerləşir.

Söhbət “Qan şəlaləsi”ndən gedir. Teylor buzlağından Bonni gölünə axan bu qırmızı rəngli axın buzla örtülmüş mənzərəyə zidd bir görünüş yaradaraq qitənin ən maraqlı landşaftlarından birini formalaşdırır.

Alimlər illərlə “Qan şəlaləsi”nin qırmızı rəng almasının səbəbini anlamağa çalışıblar. Əvvəlcə bu rəngin qırmızı yosunlardan qaynaqlandığı düşünülürdü.

Lakin daha sonrakı tədqiqatlar bu nəzəriyyəni təkzib edib. Son elmi araşdırmalar göstərir ki, şəlalənin qırmızı rəngi hava ilə təmasda oksidləşən dəmir tərkibli sudan qaynaqlanır.

“Qan şəlaləsi”ni daha da qeyri-adi edən məqamlardan biri Antarktidadakı sərt iqlimə baxmayaraq, suyun maye halında qala bilməsidir. Şəlalənin suyu dəniz suyundan iki dəfə daha duzludur. Bu yüksək duzluluq suyun donma temperaturunu aşağı salaraq sıfırın altındakı dərəcələrdə belə maye halında qalmasına imkan yaradır.

“Qan şəlaləsi” yalnız qeyri-adi görünüşü ilə deyil, həm də ekstremal şəraitdə yaşaya bilən mikroorqanizmlərə ev sahibliyi etməsi ilə maraq doğurur.

Bu araşdırmalar yalnız “Qan şəlaləsi”nin sirrini açmağa deyil, həm də astrobiologiya və digər planetlərdə həyat ehtimalı haqqında daha çox məlumat əldə etməyə imkan yaradır.