Qəzzada humanitar fəlakət | Dəhşətli təhlükə niyə getdikcə daha da artır?

Son bir ay ərzində Qəzzanın şimal hissəsinə ərzaq gətirilməsinə icazə verilmədiyi üçün onminlərlə fələstinli təkcə mərcimək və un ehtiyatları ilə qidalanır. Bu səbəbdən də minlərlə insan vəziyyətin bir qədər yaxşı olduğunu düşündükləri Qəzza şəhərinə gedir.

Səhiyyə işçiləri oktyabrın əvvəlində Qəzzanın şimalında aclıq təhlükəsinin getdikcə dəhşətli səviyyəyə çatması barədə xəbərdarlıq ediblər. Üstəlik, eyni qida ilə hazırlanan yeməklər də insanların sağlamlığında problemlər yaratmağa başlayıb.

ABŞ tərəfi bildirib ki, İsrail gündə ən azı 350 yük maşınına ərzaq və digər ləvazimatlar daşımağa icazə verməlidir. Lakin İsrail bunun öhdəsindən gələ bilmir.

İsrailin yardımların daxil olmasına nəzarət edən hərbi qurumunun məlumatına görə, oktyabrda Qəzzaya gündə orta hesabla 57 yük maşını daxil olub. BMT isə oktyabrın əvvəlində verdiyi açıqlamada gündəlik 37 yük maşınının ərzaq gətirdiyini söyləyib.

Hərbi əməliyyatlar təchizat toplamağa mane olur və yüzlərlə yük maşınının sərhəddə ilişib qalmasına gətirib çıxarır.