"Biz nüvə silahı axtarmırıq, bunu dəfələrlə bildirmişik" | Pezeşkian - Baku TV

"Biz nüvə silahı axtarmırıq. Bunu dəfələrlə bildirmişik və hər cür yoxlamaya hazırıq".

Bu sözləri İran Prezidenti Məsud Pezeşkian söyləyib.

O bildirib ki, Tehran İslam Respublikasının atom bombası axtarmadığını sübut etmək üçün nüvə fəaliyyətə ilə istənilən qurumu tanış etməyə hazırdır.

Pezeşkian ABŞ ilə onilliklərdir davam edən nüvə mübahisəsini həll etmək üçün danışıqların davam etdiyi bir vaxtda İranın Qərbin "bitmək bilməyən" tələblərinə boyun əyməyəcəyini deyib:

"İnqilabımızı devirməyə çalışanlar ABŞ və Avropa ölkələri idi. Hökumət başçısı olaraq, mövcud çatışmazlıqlara görə nəcib xalqımızdan üzr istəyirəm. Bu çatışmazlıqlara baxmayaraq, hökumətdə bütün bu problemləri qətiyyətlə həll etmək üçün tam gücümüzlə səy göstəririk. İranımız onların həddindən artıq tələblərinə boyun əyməyəcək. İranımız ədalətsizlik və təcavüz qarşısında geri çəkilməyəcək, lakin regionda sülh və sabitliyi təşviq etmək üçün bütün gücümüzlə qonşu ölkələrlə danışıqlar aparırıq".

Bundan əlavə, İran XİN-in sözçüsü İsmail Bəqai bildirib ki, ölkə hərbi hücuma məruz qalarsa, "dağıdıcı" cavab verəcək. O, İranın ABŞ ilə münasibətlərdə diplomatiyanı heç vaxt istisna etmədiyini vurğulayıb.

Bəqayi bildirib ki, İsrail İranın dinc nüvə proqramını qəsdən "İranın nüvə böhranı" kimi təqdim edir və İranla ABŞ arasında potensial danışıqlarda dağıdıcı rol oynayır.

Diplomat ABŞ-nin xarici siyasətinin İsrailin təsiri altında olmamasını təmin etməyə çağırıb.