"Ermənilərin müdafiəsi Fransanın mütləq məqsədidir" deyən Makronun planı nədir?
Fransanın müdafiə naziri Sebastyan Lekornu ölkəsinin hərbi müdaxilə yolu ilə Ermənistanın ərazi bütövlüyünü qoruya biləcəyinə inanmadığını bildirib. Eyni zamanda S.Lekornu Parisin İrəvanın müdafiə ehtiyaclarını araşdırdığını söyləyib.
Xarici agentliklər xəbər verir ki, bu barədə o, “Franceinfo” portalına müsahibəsində danışıb.
“Prezident Fransa və Ermənistanı sevən fransızlar üçün vacib olan bu məsələni şəxsən izləyir. Prezident Emmanuel Makron Ermənistanın ərazi bütövlüyü, suverenliyi və erməni xalqının müdafiəsinin Fransanın mütləq məqsədi olduğunu artıq bəyan edib”, – deyə S.Lekornu qeyd edib.
Fransa müdafiə naziri erməni həmkarı ilə çoxlu görüşlər keçirdiyini xatırladıb.
“Biz Ermənistanda indiyədək mövcud olmayan və yerli hakimiyyətlə gündəlik dialoqa imkan verən müdafiə missiyası açmışıq. Bu, xüsusilə lazım gələrsə, onların müdafiə və təhlükəsizlik ehtiyaclarının öyrənilməsi üçün lazımdır”, – deyə Fransa rəsmisi bildirib.
S.Lekornu Fransanın bölgədə hərbi müdaxiləyə əl ata biləcəyi versiyası barədə suala belə cavab verib: “Fransa hərbi müdaxilə edə bilərmi? Mən belə düşünmürəm. Aydındır ki, bu suala prezident və silahlı qüvvələrin rəhbəri cavab verməlidir. Lakin biz Ermənistanın özünü müdafiə etməsi ilə bağlı İrəvandan gələn tələbləri nəzərə alırıq”.
![icon](/images/loading.png)