Fransa dondurulmuş Rusiya aktivlərinə bunu etməkdən çəkinmir | Sensasiyalı açıqlama

Fransa dondurulmuş Rusiya aktivlərindən Ukraynaya silah tədarükü üçün istifadə etmək niyyətindədir.

Bu barədə Fransa müdafiə naziri Sebastyan Lekornunun “La Tribune” qəzetinə verdiyi müsahibəsində qeyd olunub.

Söhbət 195 milyon avro dəyərində silah tədarükündən gedir.

S.Lekornu bildirib ki, Paris Ukrayna Ordusuna “AMX-10RC” tankları və zirehli transportyorlar təqdim edəcək.

“Bundan əlavə, bu il dondurulmuş Rusiya aktivlərindən əldə olunan faiz gəlirləri sayəsində biz 195 milyon avro dəyərində yeni yardım paketi ayıracağıq. Bu, “Ukrayna Mirage 2000” qırıcıları üçün nəzərdə tutulan 155 millimetrlik artilleriya mərmilərinin və AASM idarəolunan hava bombalarının tədarükünə imkan verəcək”, – deyə S.Lekornu əlavə edib.

Fransa müdafiə naziri ABŞ-nin böyük dərəcədə qeyri-müəyyən siyasət yürütməsinə baxmayaraq, hələ də Fransa üçün müttəfiq olduğunu vurğulayıb və Avropanın Rusiya tərəfindən təhlükə ilə üzləşdiyini bildirərək təmkinli olmağa çağırıb.

“Mən Üçüncü Dünya müharibəsinin olacağını deyənlərdən deyiləm. Sadəcə indiyə qədər bildiyimiz hər şeyin sual altına alındığını və bunun ABŞ-nin qeyri-müəyyənliyinə görə daha da sürətləndiyini dərk etməliyik. Məhz buna görə biz Avropada sülhü təmin etmək üçün müdafiə səylərimizi gücləndirməliyik”, – deyə nazir vurğulayıb.