"Hörmüz boğazının blokadada saxlanılması atəşkəsin pozulmasıdır" | İrandan sərt çıxış - Baku TV

"ABŞ tərəfindən Hörmüz boğazının blokadasının davam etdirilməsi atəşkəs rejiminin pozulmasıdır və beynəlxalq hüququn əsas normalarına ziddir".

Bunu İranın Xarici İşlər Nazirliyinin rəsmi nümayəndəsi İsmayıl Bəqai Çin televiziyasına müsahibəsində deyib.

O əlavə edib ki, istənilən diplomatik prosesdə minimal səviyyədə xoşməramlı mühitin yaradılması və dialoq zamanı niyyətlərin ciddiliyinin nümayiş etdirilməsi əsas prinsipdir.

"Lakin ABŞ ilə bağlı vəziyyətdə biz lap əvvəldən ziddiyyətli davranış və öhdəliklərin pozulması ilə qarşılaşmışıq. Dəniz yollarına məhdudiyyət və ya təzyiq kimi bəzi hərəkətlərin davam etdirilməsi, beynəlxalq hüquqda düşmənçilik hərəkətləri və hətta təcavüz aktı kimi qiymətləndirilə bilər", – deyə o vurğulayıb.

Nazirliyin rəsmisinin sözlərinə görə, atəşkəs dövründə minimal öhdəliklərə əməl olunmadıqda daha geniş sazişin yerinə yetirilməsinə olan etimad da ciddi şəkildə sarsılır.

"Ticarət gəmilərinə hücumlar nəinki beynəlxalq hüququn əsas normalarını pozur, həm də bütövlükdə atəşkəs prosesində qarşı tərəfin niyyətlərinə olan inamsızlığı artırır", – deyə İ.Bəqai əlavə edib.