"Ölməkdən qorxuruq, doğmalarımız üçün qorxuruq..." | Xalq niyə müdafiəsiz qalıb? - Baku TV

Son vaxtlar Rusiya Ordusunun Ukraynaya, xüsusilə də paytaxt Kiyevə endirdiyi ballistik raket zərbələrinin intensivləşməsi fonunda ölkənin hava hücumundan müdafiə imkanları ilə bağlı ciddi narahatlıq yaranıb.

Əsas problemlərdən biri ballistik raket hücumlarının qarşısını almaq üçün nəzərdə tutulan müdafiə vasitələrinin çatışmazlığıdır.

Ukrayna müdafiə nazirinin müşavirinin ballistik raketlərə qarşı istifadə edilən hava hücumundan müdafiə raketlərinin demək olar ki, tükənməsi barədə açıqlaması müzakirələri daha da artırıb.

Vəziyyət o həddə çatıb ki, Kiyevə ballistik raket hücumları zamanı bəzən hava həyəcanı siqnalını vaxtında işə salmaq belə mümkün olmur. Hücumlar qəfil baş verdiyindən sakinlərin sığınacaqlara çatmağa vaxtı qalmır. Bu isə böyük insan tələfatına və ciddi dağıntılara səbəb olur.

Rusiya Ordusunun əsas hədəfləri arasında Kiyev, Dnepr, Xarkov, Sumı, Odessa və Ukraynanın mərkəzi hissəsində yerləşən digər şəhərlər var.

“Dörd ildir davam edən müharibə ərzində ballistik raketlərin, “Shahed” tipli dronların və Rusiyanın bizə qarşı istifadə etdiyi digər silahların bir-birindən nə ilə fərqləndiyini artıq yaxşı bilirik. Ballistik raketlər, əlbəttə ki, daha qorxuludur. Bununla belə, insanlar mövcud vəziyyətə müəyyən qədər öyrəşiblər. Bilirik ki, təhlükə və ya hava həyəcanı siqnalı olarsa, dərhal sığınacağa getmək lazımdır. Buna görə də xəbərdarlıqları daim izləyirik.

Ballistik raketlərin əsas təhlükəsi onların çox yüksək sürətlə hərəkət etməsidir. Dronlardan və digər raketlərdən fərqli olaraq onlar hədəfə çox qısa müddətdə çatır. Məsələn, Bryansk istiqamətindən raket buraxılması barədə xəbərdarlıq yayılanda həmin raket iki-üç dəqiqə ərzində artıq burada ola bilər. İnsanlar heç də həmişə sığınacağa çatmağa macal tapmırlar. Hər şey çox sürətlə baş verir.

Mən də daxil olmaqla burada yaşayan hər kəs ballistik raketlərdən çox qorxur. Çünki onlar həm çox sürətlidir, həm də son dərəcə böyük dağıdıcı təhlükə daşıyır”, – deyə Kiyev sakini bildirib.