"Sərt yolla da olsa, buna nail olacağıq" | Trampdan İrana sərt xəbərdarlıq - Baku TV

ABŞ Prezidenti Donald Tramp "ABC News"a müsahibəsində İranla bağlı vəziyyət və sülh razılaşması barədə danışıb.

"Danışıqlar çox yaxşı olacaq", – deyə o bildirib.

Tramp əlavə edib ki, ya şərtləri qəbul edəcəklər, ya da problemlərlə üzləşəcəklər.

"Onlar Hörmüz boğazından keçəcək gəmilərlə bağlı öhdəlik götürmüşdülər. Amma artıq bu öhdəliyi pozublar, çünki gəmilərə atəş açılıb. Bu, atəşkəsin pozulmasıdır. Çox ciddi pozuntudur. Görək nə olacaq. Hesab edirəm ki, hər şey yaxşı olacaq", – deyə Ağ Ev rəhbəri söyləyib.

Donald Trampdan ABŞ və İran arasında sülh razılaşmasının mümkün olub-olmadığı da soruşulub. Onun cavabı belə olub: "Sülh razılaşması olacaq. Bu və ya digər şəkildə razılaşma olmalıdır. Ya yaxşı, ya da sərt yolla buna nail olacağıq".

Bu arada, Pakistanın Baş naziri Şahbaz Şərif İran Prezidenti Məsud Pezeşkianla ABŞ-İran danışıqlarını müzakirə edib.

"Məsud Pezeşkianla dəyişən regional vəziyyətlə bağlı isti və konstruktiv söhbət etdim", – deyə Məhəmməd Şahbaz Şərif öz "X" hesabında yazıb.

"İranın iştirakını, o cümlədən tarixi danışıqlar üçün İslamabada yüksəksəviyyəli nümayəndə heyətinin göndərilməsini və Tehranda feldmarşal Asim Munirlə apardığı son müzakirələri yüksək qiymətləndirdim. Həmçinin Səudiyyə Ərəbistanı, Qətər və Türkiyə liderləri ilə son görüşlərimdən əldə etdiyim fikirləri bölüşdüm. Onu əmin etdim ki, dostlarının və tərəfdaşlarının dəstəyi ilə Pakistan davamlı sülhün və regional sabitliyin dürüst və səmimi vasitəçisi kimi öz roluna tam sadiqdir", – deyə Pakistanın Baş naziri əlavə edib.