Ərdoğan Mahmud Abbasla bir arada | Görüşün detalları açıqlandı

Fələstin Prezidenti Mahmud Abbas Türkiyəyə səfər edib.

Türkiyə lideri fəxri qonağı Prezident Sarayının giriş qapısında qarşıladıqdan sonra liderlər Türkiyə və Fələstin bayraqları önündə foto çəkdiriblər.

Mətbuata qapalı keçirilən görüşdə isə xarici işlər naziri Hakan Fidan da iştirak edib.

Liderlər İsrailin Fələstinə qarşı hücumları və regional məsələləri müzakirə ediblər. Ərdoğan bildirib ki, İsrail son quru hücumları ilə yeni mərhələyə keçib.

"İsrail yalnız Fələstini deyil, həm də regional sabitliyi təhdid edir, Qətərə yönəlmiş hücum da bunun göstəricisidir. İsraili tənqid edən lider və fikir adamlarının sayı artır, İsrailə qarşı beynəlxalq təzyiqin gücləndirilməsi üçün səylər davam etdirilir və Türkiyə hər platformada Fələstinin haqq davasını və İsrailin təcavüzünü qətiyyətlə gündəmdə saxlayacaq", ‒ deyə o bildirib.

Ərdoğan həmçinin qeyd edib ki, Türkiyənin prioriteti Qəzzada təcili atəşkəsin təmin olunması və bölgədəki humanitar faciənin aradan qaldırılmasıdır.

O, İsrailin sülhü pozan davranışlarını hər fürsətdə ifşa etdiklərini, Türkiyənin BMT Baş Assambleyasında Fələstinin səsi olacağını bəyan edib.