Rusiya bu öhdəliyinə əməl etməsə... | Qazaxıstanda nələr baş verir?

Rusiya Qazaxıstan ərazisində daş kömürlə işləyəcək 3 istilik elektrik stansiyasının tikintisi üçün subsidiya və dövlət krediti vədinə əməl etmir.

Qazaxıstan mediası xəbər verir ki, söhbət Semey, Ust-Kamenoqorsk və Kokşetauda inşa olunacaq İES-lərdən gedir.

Qazaxıstanın Baş naziri Oljas Bektenov mətbuat konfransında bildirib ki, Rusiya maliyyələşmə öhdəliyinə əməl etməsə, Astana özü stansiyaların tikintisinə başlayacaq:

"İlkin olaraq üç İES-in Rusiya tərəfdaşları ilə birgə həyata keçirilməsi variantı nəzərdən keçirilirdi. Hələlik Rusiya tərəfdən zəmanətli, daha ucuz maliyyə təminatının verilməsi ilə bağlı dəqiq məlumat almamışıq, ona görə də Kokşetauda biz artıq heç kimə müraciət etmədən öz gücümüzlə tikintiyə başlamışıq. Artıq "Samruk-Enerqo" işə cəlb olunub, ərazidə işlər gedir. Semey və Ust-Kamenoqorsk məsələsinə gəlincə isə biz hazırda Rusiya tərəfinin cavabını gözləyirik, əgər yaxın vaxtlarda cavab olmasa, biz bu layihələrin də müstəqil həyata keçirilməsi variantlarını nəzərdən keçirəcəyik".