Rusiya Federasiya Şurasının sədrindən Simonyana sərt sözlər

Rusiya Federasiya Şurasının sədri Valentina Matviyenko senatorlara Ermənistan parlamentinin sədri Alen Simonyanın Rusiya əleyhinə bəyanatları ilə bağlı sorğu hazırlayaraq Ermənistan parlamentinə göndərməyi tapşırıb.

V.Matviyenko A.Simonyanın artıq bütün “qırmızı xətləri” keçdiyini bildirib.

Qeyd edək ki, A.Simonyan Avropa İttifaqı ölkələrinin parlament sədrlərinin iclasında deyib ki, Ermənistan qətiyyətlə Ukrayna, eləcə də Moldova, Gürcüstan, Kipr və bütün ölkələrin ərazi bütövlüyünü müdafiə edir. Maraqlı məqam odur ki, o bu fikirləri konfransın “Rusiyanın Ukraynaya müdaxiləsi və Yaxın Şərqdəki münaqişə” mövzusunda olduğunu nəzərə alaraq səsləndirib.

"Mən həmkarıma, Ermənistan parlamentinin sədrinə sual vermək istərdim: o, kimin adından bu cür fikirlər səsləndirib? Təbii ki, Rusiya ilə çoxəsrlik dostluğu olan erməni xalqı adından deyil. Biz bu cür rusofob çıxışı nəzərdən qaçıra bilmərik.

Mən Ermənistan parlamentinə yazılı sorğu göndərərdim ki, o, kimin adından danışıb və Ermənistan parlamenti bu səslənən fikirləri dəstəkləyirmi? Biz bu cür rusofob, anti-Rusiya çıxışı diqqətsiz qoymayacağıq. Sadəcə, həmkarımız üçün ayıbdır. O, artıq bütün “qırmızı xətləri” keçib”, – V.Matviyenko deyib.

Qeyd edək ki, Alen Simonyanın çıxışının mövzusunu Federal Şuranın plenar iclasında qurumun beynəlxalq komitəsinin rəhbəri Qriqori Karasin qaldırıb. O bildirib ki, A.Simonyanın bəyanatı qeyri-dost tonda edilib.