Rusiya Ordusu 3 yaşayış məntəqəsini ələ keçirdi

Rusiya və Ukrayna arasında hazırkı cəbhə xəttində 120 döyüş qeydə alınıb. Hərbi toqquşmalardan 39-u Pokrovskda baş verib.

Döyüşlərdə Rusiya Ordusunun 910 hərbçisinin məhv edildiyi bildirilir. Ukrayna Silahlı Qüvvələrinin Baş Qərargahının məlumatına görə, Rusiyaya aid 600 texnika sıradan çıxarılıb.

Rusiya Ordusu Dnepropetrovsk və Sumı vilayətlərinin enerji infrastrukturunu atəşə tutub. Yanğınlar qeydə alınıb.

Xerson da hava zərbələrinə məruz qalıb. 3 nəfər ölüb, 14 sakin yaralanıb. Rusiya Ordusu yaşayış məntəqələrinə dron vasitəsilə partlayıcılar atıb. Xarkov da bombalanıb, 6 nəfər xəsarət alıb.

Ümumilikdə oktyabrın 24-də gecə saatlarında Rusiya Ordusu Ukraynaya 128 “Şahed” və “Qerbera” dronu ilə hücum edib. Rusiya da PUA hücumuna məruz qalıb. Dronlardan 7-si Kaluqa və Moskva vilayətlərində vurulub.

Rusiyanın Hava Hücumundan Müdafiə sistemi Moskva şəhərinə istiqamətlənən 3 PUA-nı da məhv edib. Bu barədə Moskvanın meri Sergey Sobyanin məlumat verib.

Gecə saatlarında isə Rusiyanın Hava Hücumundan Müdafiə qüvvələri Ukraynaya məxsus 25 dronu zərərsizləşdirib. Məlumatı Rusiyanın Müdafiə Nazirliyi yayıb.

Rusiya Müdafiə Nazirliyinin digər məlumatına görə, Xarkovun Boloqovka və Donetskin Promin yaşayış məntəqələri nəzarətə götürülüb. Bundan başqa, Donetskin Dronovka yaşayış məntəqəsi də ələ keçirilib.

Bu barədə isə Rusiyanın “Cənub” hərbi qruplaşmasının komandanı general-polkovnik Aleksandr Sançik Rusiyanın müdafiə nazirinə məruzə edib.

Sözügedən qruplaşmanın həftə ərzində 1485 ukraynalı hərbçini öldürdüyü, 6 tankı sıradan çıxardığı bildirilir. Ukraynaya məxsus 22 silah anbarı da məhv edilib.

“Mərkəz” hərbi qruplaşması isə həftə ərzində Ukraynanın 3610 hərbi qulluqçusunun öldürüldüyünü açıqlayıb.