Rusiya Şoyqudan qurtulmağa çalışır? - Bu müəmmalı hadisə əks-səda yaratdı

Rusiya Təhlükəsizlik Şurasının katibi Sergey Şoyqunun planlı tibbi müayinədən keçməsi ilə bağlı xəbər siyasi dairələrdə adi bir hadisə kimi deyil, onun gələcək karyerası ilə bağlı məsələnin aydınlaşması kimi qiymətləndirilir.

Bu barədə Rusiya mətbuatı yazıb.

Məlumata görə, belə bir tibbi müayinə adətən hərbi qulluqçuların ehtiyata buraxılması öncəsi keçirilir və bu prosesin zəruri mərhələsi hesab olunur:

“Hadisələrin iki ssenari üzrə inkişaf edəcəyi güman olunur. Birinci variant “şərəfli istefa” və Şoyqunun Federasiya Şurasına keçməsi, eləcə də ölkənin müdafiə sənayesində aparılan antikorrupsiya tədbirləri ilə bağlı hər hansı şərhdən tam çəkinməsidir. İkinci variant isə cinayət təqibidir. Müdafiə Nazirliyindəki korrupsiya sxemləri üzrə aparılan araşdırmalar fonunda bu ehtimal getdikcə artır. Çünki orada həyata keçirilən genişmiqyaslı maliyyə əməliyyatlarının nazirin xəbəri olmadan baş tutması çətin görünür”.

Qeyd olunub ki, Şoyquya yaxın şəxslər onun müdafiə naziri vəzifəsindən getdikdən sonra qeyri-müəyyən vəziyyətdə olduğunu bildirirlər:

“Bir neçə həftəyə 70 yaşını tamamlayacaq Şoyqu üçün bu, təqaüdə çıxmaq baxımından münasib vaxt kimi görünür. Həqiqətən də bu il onun fəaliyyəti xeyli azalıb. O, sonuncu dəfə ictimaiyyət qarşısında apreldə – BRİKS ölkələrinin nümayəndələrinin görüşündə çıxış edib. Şoyqu bu il heç nə ilə yadda qalmadı. Görünür, ona bu vəzifəni yalnız müavinlərinin bir-bir həbsindən sonra sakit şəkildə getməsi üçün verdilər”.