Rusiya Ukraynanın “Çernomorsk” limanını vurdu

Rusiya Ukraynanın enerji infrastrukturuna yeni zərbələr endirib. Nəticədə, Xarkov və Jitomir vilayətlərindəki yaşayış məntəqələri elektriksiz qalıb.

Bu barədə “RBK-Ukrayna” ölkənin Energetika Nazirliyinə istinadən məlumat yayıb.

Qurumdan qeyd edilib ki, qəza-bərpa işləri davam etdirilir.

Ukraynanın Odessa vilayətinin “Çernomorsk” limanındakı bərə dayanacağı da hücuma məruz qalıb. Baş nazirin müavini Aleksey Kulebanın sözlərinə görə, hadisə zamanı bir nəfər yaralanıb, üç konteyner zədələnib və yağ sızıntısı baş verib. Suyun çirklənməsinin qarşısının alınması üçün işlər aparılır.

Ukrayna paytaxtı Kiyevdə isə Rusiya tərəfindən enerji obyektlərinə edilən hücumların nəticələrini aradan qaldırmaq üçün Qərargah yaradılıb.

Belə bir açıqlama ilə energetika naziri Denis Şmıqal çıxış edib.

Qərargah 24/7 işləyəcək. Məqsəd enerji və istilik təminatı ilə bağlı vəziyyəti stabilləşdirmək üçün cari çağırışlara operativ və səmərəli şəkildə reaksiya verməkdir.

O, sonda qeyd edib ki, enerji infrastrukturunun qorunmasına xüsusi diqqət yetirilib.