Rusiya və Ukrayna arasında qanlı döyüşlər | Cəbhədə gərgin gecə

Sentyabrın 1-dən 2-nə keçən gecə Rusiya Silahlı Qüvvələri Ukraynanın Kiyev, Sumı, Odessa, Zaporojye vilayətlərini kütləvi dron hücumuna məruz qoyub.

Ukrayna hava hücumundan müdafiə qüvvələrinin məlumatında qeyd olunub ki, gecədən səhərə qədər ölkəyə 150 PUA ilə hücum olub. Onlardan 120-si zərərsizləşdirilib. Hücum itkisiz ötüşməyib, ölən və yaralananlar var.

Sumıda PUA qalıqlarının yaşayış binasına çırpılması yanğınlara səbəb olub. Mülki infrastruktura, avtomobillərə ziyan dəyib. Bundan başqa, Rusiyanın zərbələri nəticəsində Zaporojyedə bir nəfər həlak olub.

Qeyd edək ki, sutka ərzində 172 hərbi toqquşma qeydə alınıb. Ukrayna Silahlı Qüvvələrinin Baş Qərargahından vurğulanıb ki, döyüşlərdən 46-sı Pokrovsk istiqamətində olub. Bununla yanaşı, Rusiyanın daha 800 hərbçisi və çox sayda hərbi texnikası məhv edilib.

Cavab atəşi olaraq Ukrayna da Rusiyaya PUA ilə hücum edib. Rusiya Müdafiə Nazirliyindən bildirilib ki, hava hücumundan müdafiə sistemi Rostov vilayətində təyyarə tipli PUA-nı məhv edib.