Rusiyada miqrant ailələr dalana dirəndi | Ölkəyə səs salan qalmaqallı xəbər

Rusiyada qeyri-qanuni yaşayan miqrantların ölkədə qalmalarını leqallaşdırmaqları üçün son bir gün qalıb.

Rusiya Daxili İşlər Nazirliyinin məlumatına görə, sentyabrın 10-da ölkədə qalmaları qeyri-qanuni olan əcnəbilərə öz statuslarını leqallaşdırmağa icazə verən Prezident Fərmanının müddəti başa çatır.

"Sentyabrın 11-dən qeyd edilən əcnəbi vətəndaşlar barəsində Rusiyadan çıxarılmalarına qədər fərdi hüquqların, o cümlədən gələcəkdə Rusiyaya girişin məhdudlaşdırılması üçün qanunla nəzərdə tutulmuş bütün tədbirlər tətbiq ediləcək", ‒ deyə nazirlikdən bildirilib.

Sentyabrın 11-dən öz statusunu tənzimləməmiş əcnəbilər məhdudiyyətlərlə üzləşəcəklər. Onlara nikahı qeydiyyata almaq, boşanmaq, uşaqlarını təhsil müəssisələrinə yerləşdirmək, avtomobil idarə etmək və gündəlik həyatda zəruri olan digər xidmətlərdən istifadə etmək qadağan olunacaq.

Bununla yanaşı, Rusiya məktəblərində təhsil almaq üçün müraciət edən miqrant uşaqlarının 87%-dən çoxu qeydiyyatdan keçə bilməyib.

"Rosobrnadzor"un məlumatına görə, aprel-avqust aylarında xarici vətəndaşlığı olan 23 616 uşaq üçün sənəd təqdim edilib. İmtahana cəmi 8223 uşaq üçün sənədlərin tam toplusu təqdim olunub. 5940 uşaq testdən keçib, onlardan cəmi 2964-ü Rusiya məktəblərində təhsil almaq üçün sınaqdan uğurla keçib. Buna səbəb isə Rusiyada miqrant uşaqlarının orta məktəblərə qəbul prosesinin çətinləşdirilməsidir.

Əcnəbilərin uşaqlarının rus dili bilik səviyyəsi yoxlanılaraq məktəblərə qəbul edilir. Rusiyada bunu məktəblərdə yer çatışmazlığı ilə əlaqələndirirlər. Bildirilir ki, ümumiyyətlə, əmək miqrantlarına ailələrini Rusiyaya gətirmək qadağan oluna bilər. Bu barədə qanun layihəsi artıq Dövlət Dumasına daxil olub.

Layihəni “Ədalətli Rusiya ‒ Həqiqət naminə” fraksiyasının rəhbəri Sergey Mironov və deputatlar Oleq Nilov, Yana Lantratova, Andrey Kuznetsov və Mixail Delyagin hazırlayıb.

Təşəbbüsün müəllifləri hesab edirlər ki, miqrant ailələr sosial infrastruktura ‒ məktəblərə, xəstəxanalara həddindən artıq yük yaradırlar. Bu yük əmək fəaliyyəti ilə məşğul olmaq üçün rəsmi icazədən, yəni patentlərdən əldə edilən gəlirlə kompensasiya olunmur.

Deputatlar hesab edirlər ki, qanun layihəsi təsdiqlənərsə, Rusiya Federasiyasına miqrant axını 15-20% azala bilər. Sözügedən qadağanın Belarus vətəndaşları və yüksək ixtisaslı xarici mütəxəssislər üçün istisna edildiyi təklif edilib.