Rusiyada Prezident Administrasiyasında həyəcanlı anlar | Saxlanılan var

Moskvada oyuncaq avtomatla Prezident Administrasiyasının binasına girməyə cəhd edilib.

“Baza” “Telegram” kanalının məlumatına görə, aprelin 3-də səhər saatlarında Federal Mühafizə Xidmətinin əməkdaşları İlyinka küçəsində yerləşən Prezident Administrasiyasının binasının yaxınlığında şübhəli bir adam görüblər.

Adamın üstündə avtomata oxşayan bir əşya olub. Naməlum şəxs vestibülə daxil olanda mühafizəçilər hər iki tərəfdən qapıları bağlayıb və polis çağırıblar. Həmin şəxs saxlanılıb.

Onun Ukrayna doğumlu, 69 yaşlı Viktor Krasivski olduğu məlum olub. V.Krasivskinin üstündə qəhvəyi qundağı olan qara “Kalaşnikov” avtomatı şəklində uşaq oyuncağı aşkar olunub.

V.Krasivski polisə izah edib ki, o, 15 ildir Prezidentlə görüşmək istəyir, lakin ona həmişə rədd cavabı verilib. Bu dəfə də o, aktual məsələləri müzakirə etmək üçün “şəxsi qəbulda” iştirak etmək qərarına gəlib. V.Krasivski polis şöbəsinə aparılıb, daha sonra psixiatrik xəstəxanaya yerləşdirilib.