Rusiyalı mütəxəssisdən vacib məsləhətlər

"Qaynadılmamış, yəni adi kran suyu içmək potensial olaraq təhlükəlidir. Çünki maye ilə birlikdə orqanizmə viruslar, bakteriyalar və parazitlər daxil ola bilər".

Bunu rusiyalı infeksionist həkim Vladimir Neronov deyib.

"Mümkün patogenlərə hepatit A virusları, rotaviruslar və noroviruslar daxildir. Bunlar bağırsaq infeksiyalarına, eləcə də qaraciyər zədələnməsinə səbəb ola bilər. Eyni zamanda, suyun normal bakterioloji göstəriciləri belə onun virus təhlükəsizliyinə zəmanət vermir", – deyə həkim bildirib.

Mütəxəssisin sözlərinə görə, kran suyunun təhlükəsizlik dərəcəsi onun təmizlənmə keyfiyyətindən və konkret regiondakı şəbəkələrin vəziyyətindən asılıdır: "Yaxşı su təmizləmə sistemi olduqda belə, xüsusilə, qəzalar və ya sanitar normalarının pozulması zamanı yoluxma riskini tam istisna etmək mümkün deyil".

Rusiyalı alim risklərin azaldılması üçün suyun qaynadılmasını, sertifikatlaşdırılmış filtrlərdən istifadəni, ultrabənövşəyi emalı və ya mərkəzləşdirilmiş xlorlamanı tövsiyə edir. Həmçinin o, əsas gigiyena qaydalarına əməl etməyi, meyvə və tərəvəzləri yaxşıca yumağı, eləcə də əhalinin ən həssas qruplarının sağlamlıq vəziyyətini nəzərə almağı məsləhət görür.