Rusiyanı silkələyəcək döyüş hazırlığı | NATO Rusiya qarşısında nə qədər güclüdür?

NATO Rusiyanın qərb sərhədlərində kontingentini artırır və hərbi infrastrukturunu inkişaf etdirir, “yumruq zərbəsi” formalaşdırır.

Bu barədə TASS-a müsahibəsində Rusiya Federasiyası Təhlükəsizlik Şurasının katibi Sergey Şoyqu bildirib.

O deyib: “Son bir il ərzində NATO ölkələrinin Rusiya Federasiyasının qərb sərhədləri yaxınlığında yerləşdirilən hərbi kontingentinin sayı təxminən 2,5 dəfə artıb. Şərqi Avropa dövlətlərinin ərazisində hərbi infrastrukturun sistemli inkişafı, strateji raketdən müdafiə sistemlərinin yerləşdirilməsi kimi Avropada yüksək döyüş potensialının saxlanmasına yönəlmiş tədbirlər görülməkdədir”.

S.Şoyqu qeyd edib ki, NATO 10 gün ərzində Rusiya sərhədləri yaxınlığında 100, 30 gün ərzində 300 minlik, 180 gün sonra isə 800 min nəfərlik qrupun yerləşdirilməsi imkanını nəzərdə tutan yeni döyüş hazırlığı sisteminə keçir:

“2023-2024-cü illərdə keçirilən təlimlər zamanı bu tapşırıqlar açıq şəkildə işlənib. Baltikyanı ölkələr öz ərazilərində müdafiə xətləri və NATO hərbi birləşmələri üçün hərbi bazalar tikmək üçün Qərbin pulundan istifadə edirlər. Amerikanın “Abrams” tanklarından əlavə, Polşa Cənubi Koreyanın zirehli texnikasını da aktiv şəkildə alır. 2026-cı ilin sonunadək 180 “Qara Pantera” K2 tanklarının alınması planlaşdırılır”.

Onun sözlərinə görə, NATO ölkələri də hava hücumundan müdafiə sistemlərini fəal şəkildə modernləşdirir:

“Norveç, Belçika və Niderland F-35 təyyarələri alaraq döyüş təyyarələri parklarını yeniləyir, Rumıniya və Bolqarıstan isə F-16 taktiki qırıcıları alır. Eyni zamanda NATO təyyarələrini qəbul etmək üçün “şərq cinahında” aerodrom şəbəkəsi hazırlanır”.

S.Şoyqu vurğulayıb ki, NATO ölkələrinin ümumi hərbi xərcləri Rusiyanın hərbi büdcəsindən 14 dəfə artıqdır.