Rusiyanın müvəqqəti işlər vəkili İsveç XİN-ə çağırıldı

Ukraynanın bu yaxınlarda atəşə tutulması və NATO-nun üzv ölkələrinin hava məkanının pozulması ilə əlaqədar Rusiyanın müvəqqəti işlər vəkili İsveç Xarici İşlər Nazirliyinə çağırılıb.

Bu barədə nazirliyin mətbuat xidməti məlumat yayıb.

"Rusiyanın Ukraynanı bu yaxınlarda atəşə tutması, nəticədə dinc sakinlərin həlak olması və xəsarət alması, həmçinin mülki infrastrukturun hədəf alınması ilə əlaqədar Rusiyanın müvəqqəti işlər vəkili İsveç XİN-ə çağırılıb", – deyə məlumatda bildirilib.

Qeyd edək ki, avqustun 1-nə keçən gecə Kiyevə endirilən zərbələr nəticəsində Litva səfirliyinin binasına ziyan dəyib, iyulun 24-də isə Slavyanskda Litvanın fəxri konsulluğunun binası dağıdılıb.

İsveç Xarici İşlər Nazirliyi Rusiyanın Ukraynaya zərbələrini, eləcə də Rusiya tərəfindən NATO üzrə müttəfiqlərin hava məkanının bu yaxınlarda pozulmasını pisləyib və Moskvanı beynəlxalq humanitar hüquqa riayət etməyə çağırıb.