Sammit başlamamış qalmaqal başladı | Ukraynaya dəstək və bu mövzularla bağlı...

G7 ölkələrinin liderlərinin gələn həftə Kanadada keçiriləcək sammitində ABŞ və digər üzvlər arasında, o cümlədən Ukraynadakı müharibə, iqlim siyasəti və sosial məsələlərlə bağlı dərin fikir ayrılıqlarını əks etdirən birgə yekun Bəyannamə ilə bağlı konsensusa gəlmələri gözlənilmir.

“Bloomberg” xəbər verir ki, ABŞ və tərəfdaşlar arasında fikir ayrılıqları dərinləşir. Ona görə də G7 sammitində ənənəvi yekun vahid sənəd əvəzinə konkret mövzular üzrə bir neçə birgə bəyanat gözlənilir. G7 ölkələri ABŞ-nin yeni lideri ilə hər hansı gərginlik və mübahisədən qaçmaq üçün belə bir razılığa gəliblər.

Qeyd edək ki, 2018-ci ildə G7-nin sammitində imzalanan yekun bəyannamədən qısa zaman sonra ABŞ-nin ozamankı prezidenti Donald Tramp birgə bəyannamədən imtina edib.

İndi də G7-lər belə bir vəziyyətlə qarşılaşmamaq üçün birgə yekun sənəd imzalamayacaqlar. Çünki keçənilki 36 səhifəlik bəyannamədə Ukraynaya dəstək, iqlim dəyişikliyi ilə mübarizə və gender bərabərliyinin inkişafı ilə bağlı bəyanatlar yer alırdı. Lakin D.Tramp Administrasiyası ABŞ-nin siyasətini dəyişdirərək, bu prinsiplərdən imtina edərək özünün təcridçi mövqeyinə nail olub.

Hazırkı sammitdə G7 liderləri digər məsələlərlə yanaşı, süni intellekt, enerji təhlükəsizliyi, meşə yanğınları, Ukrayna və Yaxın Şərqdəki münaqişələri müzakirə edəcəklər.

Kanadada keçiriləcək sammitə Hindistan, Braziliya, Meksika və digər ölkələrin liderləri ilə yanaşı, Ukrayna Prezidenti Volodimir Zelenski də qatılacaq.