Sünnət mərasimi faciə ilə sonlandı

Cənubi Afrika Respublikasında (CAR) kosa xalqı arasında ildə iki dəfə keçirilən ulvaluko adlı ənənəvi sünnət ayini bu il də faciə ilə nəticələnib.

Məlumatlara əsasən, 2025-ci ildə bu mərasim zamanı 39 yeniyetmə ölüb, yüzlərlə gənc isə ağır xəsarətlər alıb. Yaralanmalar arasında cinsiyyət orqanının amputasiyası kimi ciddi hallar da qeydə alınıb.

Ulvaluko ayinində iştirak etməyənlər qəbilə içində sosial izolyasiya ilə üzləşir, ictimai yığıncaqlarda iştirak və evlənmək hüququndan məhrum olunurlar. Bu 3 həftəlik ayin adətən uzaq dağlıq ərazilərdə qurulmuş xüsusi daxmalarda – inisiasiya məktəblərində həyata keçirilir.

Qeyd olunur ki, ölkədə yüzlərlə qeyri-qanuni inisiasiya məktəbi fəaliyyət göstərir. Onlar daha çox cinayətkar dəstələrin nəzarətində olurlar. Orada çalışanların isə tibb təhsili yoxdur.

Onlar sünnət əməliyyatı üçün itilənmiş nizə ucluqları, köhnə ülgüclər və çirkli bıçaqlardan istifadə edirlər. Bu alətlər bir neçə dəfə dezinfeksiya olunmadan istifadə edilir.