Sünniləri özündən çıxaran qalmaqal | Bu şəxs vəzifəsindən qovuldu, amma...

İran televiziyasının birinci kanalında müsəlmanların birinci xəlifəsi Əbu Bəkrin təhqir olunması ölkədə yaşayan sünni məzhəbli müsəlmanların etirazı ilə qarşılaşıb.

“Kult.az” xəbər verir ki, bu barədə Bəluc Fəallarının Kampaniyası məlumat yayıb.

Məlumata görə, Əbu Bəkr aprelin 23-ü axşam saatlarında “Simaye xanevade” adlı verilişdə təhqir olunub, onun islam dünyasına mənsubluğu şübhə altına alınıb. Bundan sonra sünni məzhəbli dini xadimlər sosial media platformalarında paylaşım edərək, dövlət televiziyasını müsəlmanlar arasında nifaq salmaqda günahlandırıblar.

Etiraz paylaşımları və bəyanatların artmasından sonra dövlət televiziyası bəyanat yayaraq, hadisəni “bağışlanılmaz və şübhəli” adlandırıb, sünnilərdən üzr istəyib və televiziyanın bölmə rəisi və aparıcısının işdən çıxarıldığını elan edib.

Dövlət televiziyası bununla yanaşı, verilişin bütün platformalardan silindiyini, verilişin hazırlanması və yayımlanmasında əməyi olan daha 8 nəfərin məhkəməyə verildiyini və barələrində cinayət işi açıldığını bildirib.