ABŞ kəşfiyyatı: İran hakimiyyəti ölkə üzərində nəzarəti hələ də saxlayır

ABŞ kəşfiyyat orqanlarının hazırladığı son hesabatlara görə, İran rəhbərliyi ölkə üzərindəki nəzarəti hələ də böyük ölçüdə qoruyub saxlayır. Baku.tv-nin "Reuters" agentliyinə istinadən verdiyi məlumata görə, ABŞ və İsrailin fevralın 28-dən başlayan intensiv hava zərbələrinə və hərbi əməliyyatlarına baxmayaraq, İranın dövlət strukturları və idarəetmə mexanizmləri bütövlüyünü itirməyib. Kəşfiyyat məlumatlarında qeyd olunur ki, Ali Rəhbər Seyid Əli Xameneinin ölümündən sonra hakimiyyətə gələn Müctəba Xamenei və müvəqqəti rəhbərlik, xüsusilə SEPAH (İslam İnqilabı Keşikçiləri Korpusu) vasitəsilə daxili asayişi təmin etməkdə davam edir. Donald Tramp administrasiyasının iranlıları "öz hökumətlərini devirməyə" çağırmasına rəğmən, Amerika xüsusi xidmət orqanları yaxın gələcəkdə İran rejiminin süqutunun gözlənilmədiyini bildirirlər. Bu təhlil göstərir ki, İran rəhbərliyi həm hərbi, həm də siyasi baxımdan hələ də "ayaqdadır" və kütləvi etirazların rejimi devirməsi üçün kifayət qədər zəmin yoxdur.