Suriyaya daxil olan müxalifət qüvvələri xalqa müraciət etdi

Suriya hökuməti silahlılardan təhlükəsizlik zəmanəti alıb.

TASS xəbər verir ki, bu barədə respublikanın rabitə naziri Əl-Xətib məlumat verib.

“Hərbi Əməliyyatlar İdarəsindən zəmanət aldıq, silahlılar Dəməşqi nəzarətə götürdülər. Onlar hökumətin təhlükəsiz fəaliyyətini təmin edəcəyinə söz veriblər”, – deyə nazir bildirib.

Əl-Xətib vurğulayıb ki, Dəməşqdə qalan nazirlər Xarici siyasət idarəsinin rəhbəri Bassam Sabbaqın harada olduğunu bilmirlər. Rabitə nazirinin sözlərinə görə, hökumət üzvləri iki gün ərzində öz işlərinə qayıdacaqlar.

Suriya paytaxtını ələ keçirən müxalifət qüvvələri ölkədə keçid hökumətinin qurulduğunu bəyan ediblər. Bununla bağlı görüntüləri Suriya televiziyası yayıb.

“Biz Suriya xalqından bu tarixi mərhələdə birləşməyi və bir yerdə olmağı xahiş edir, yeni Suriyanın heç kimin inhisarında olmadığını, hamı üçün Vətən olacağını vurğulayırıq”, – deyə videomüraciətdə bildirilib.