Ət və ağartı məhsullarının qiyməti od tutub yanır

Ermənistan bazarlarında 12 aylıq inflyasiyanın səviyyəsi 3,7 faizdir. Avqust ayı ilə müqayisədə sentyabrda inflyasiya 0,3 faiz artıb. İnflyasiyanın qeyd olunan 3,7 faizə qalxması isə 2024-cü ilin sentyabr ayı ilə müqayisənin nəticəsidir.

“News.am” bu informasiyanı Ermənistanın Statistika Komitəsindən əldə edib. 2024-cü illə müqayisədə 2025-ci ildə ərzaq və alkoqolsuz içki qiymətlərində 5,8 faiz bahalaşma qeydə alınıb. Çörək 6, un isə 7,2 faiz bahalaşıb. 2024-cü illə müqayisədə Ermənistanda toyuq ətinin dəyəri 1,9 faiz artıb. Mal ətinin qiyməti 3,1 faiz bahalaşıb. Qoyun ətinin dəyəri isə 4,9 faiz artıb.

Ən bahalaşan məhsul donuz ətidir. Ermənistanda donuz ətinin qiyməti 9,4 faiz bahalaşıb. Bu ölkədə ağartı məhsullarının da qiyməti artıb. Süd 1,5, pendir isə 2,1 faiz bahalaşıb.

İnflyasiya yağın da qiymətinə təsirsiz ötüşməyib. Marqarin 3,5, kərə yağı isə 12,5 faiz bahalaşıb. 2024-cü ilin sentyabrından 2025-ci ilin sentyabrına qədər digər məhsulların da qiyməti dəyişib. Məsələn, çay 3,5, kofe 14,2, kakao isə 21,7 faiz bahalaşıb.