Tarixi Soçi görüşündə müzakirə edilən əsas mövzular

Soçidə Türkiyə Prezidenti Rəcəb Tayyib Ərdoğanla Rusiyanın dövlət başçısı Vladimir Putin arasında görüş keçirilib.

Soçidəki “Rus” adlı sanatoriyada baş tutan danışıqlar ilk olaraq nümayəndə heyətlərinin iştirakı ilə baş tutub, daha sonra isə liderlər görüşü məhdud çərçivədə davam etdiriblər. Vladimir Putin Rəcəb Tayyib Ərdoğanı qapıda qarşılayıb. Liderlərin ayaqüstü görüşü zamanı maraqlı dialoq da yaşanıb.

Putin-Ərdoğan görüşündə təhlükəsizlik kimi çox mühüm məsələlər müzakirə olunub. İki ölkə arasında mövcud layihələrin icrasından bəhs edilib. Bundan başqa, Ukraynadakı vəziyyətdən, “Taxıl sazişi”ndən və Suriya məsələsindən də danışılıb.

Rusiya lideri görüşün jurnalistlər üçün açıq olan hissəsində bildirib ki, iki ölkənin əlaqələri heç kimin gözləmədiyi şəkildə inkişaf edir. Türkiyə Prezidenti isə dünyanın, xüsusilə Afrikanın az inkişaf etmiş ölkələrinin “Taxıl sazişi” ilə bağlı müzakirənin nəticələrini gözlədiyini əlavə edib. O, meşə yanğınları ilə mübarizə sahəsində Rusiyanın Türkiyəyə göstərdiyi yardıma görə Vladimir Putinə təşəkkür edib.