TBMM-in yeni sədri bəlli oldu

08 iyun 2023 71 baxış

AK Parti və MHP-nin namizədi olan Numan Kurtulmuş Türkiyə Böyük Millət Məclisinin sədri seçilib. Bu barədə “TRT Haber” məlumat yayıb.

Bildirilib ki, səsvermənin 1-ci turunda millət vəkillərinin 317-si onun lehinə səs verib. Bu, yetərsay olmadığı üçün sədr seçimi 2-ci tura qalıb. 2-ci turda da yetərli say olmayıb. N.Kurtulmuş bu mərhələdə 321 səs ala bilib. 3-cü səsvermədə isə o, eyni səslə sədr seçilib.

Həmçinin bu münasibətlə Türkiyə Prezidenti Rəcəb Tayyib Ərdoğan N.Kurtulmuşa zəng vuraraq onu təbrik edib. Bu barədə R.T.Ərdoğanın rəsmi sosial şəbəkə hesablarında məlumat paylaşılıb.

Prezident yeni qanunvericilik dövrünün uğurlu olmasını arzulayıb. “Türkiyə Böyük Millət Məclisinin sədri seçilən dəyərli yol yoldaşım Numan Kurtulmuşu təbrik edir, ona vəzifəsində uğurlar arzulayıram. Mən ona parlamentin sədri seçildikdən sonra bizləri ziyarət etdiyinə görə təşəkkürümü bildirirəm”, – deyə Türkiyə Prezidenti bildirib.

#Türkiyə Böyük Millət Məclisi