Tehrandan Vaşinqtona sərt hədə | “Göz qırpmadan ABŞ bazalarını...”

“Əgər nüvə danışıqları nəticəsiz qalsa və bizimlə konflikt yaratsalar, istənilən aqressiyada qarşı tərəf daha çox itki verəcək. ABŞ isə məcbur qalıb regiondan çıxmalı olacaq”.

“İRNA”nın məlumatına görə, bunu İranın müdafiə naziri Əziz Nəsirzadə jurnalistlərlə söhbət zamanı bildirib.

Ə.Nəsirzadə ABŞ-nin bölgəni tərk etməli olduğu barədə fikrinə aydınlıq gətirib.

“ABŞ-nin bütün bazaları İran üçün əlçatan ərazilərdə yerləşir. Biz isə göz qırpmadan Amerikanın mövqelərini atəşə tutacağıq”, – deyən nazir İranın müdafiə sahəsində gücləndiyini də xatırladıb. İkitonluq başlığa malik raketin uğurlu sınaqları da buna misaldır.

İranın xarici işlər naziri Abbas Ərağçi isə “X” hesabında yazıb ki, sülh xarakterli nüvə proqramının davam etdirilməsinə zəmanət verilsə, ABŞ ilə razılaşmanın imzalanması mümkündür. Çünki nüvə proqramı Atom Enerjisi üzrə Beynəlxalq Agentliyin nəzarətində olacaq və İrana qarşı sanksiyalar aradan qaldırılacaq.

O ki qaldı ABŞ Prezidenti Donald Trampın “İran nüvə silahına sahib olmamalıdır” bəyanatına, A.Ərağçi bildirib ki, onsuz da bu, İranın doktrinasına uyğundur və razılaşmanın əsasını təşkil edə bilər.