Tramp 3 lideri hədəfə aldı | Müharibə başlamaya bilərdi, amma...

ABŞ Prezidenti Donald Tramp Ukraynada hərbi əməliyyatların başlamasında Rusiya Prezidenti Vladimir Putin, Ağ Evin keçmiş rəhbəri Co Bayden və Ukrayna lideri Volodimir Zelenskinin günahkar olduqlarını bildirib.

Bu barədə xarici mediada məlumat yayılıb.

D.Tramp bildirib ki, səhv olan müharibənin başlamasına icazə vermək idi. Siyasətçi bir daha vurğulayıb ki, onun prezidentliyi dövründə münaqişə başlamazdı. D.Tramp hesab edir ki, C.Baydenin neftin qiymətini aşağı salmaqla eskalasiyanın qarşısını almaq imkanı olub.

"C.Bayden bunu dayandıra bilərdi, V.Zelenski də dayandıra bilərdi, V.Putin isə bunu başlatmamalı idi. Hər kəs günahkardır", ‒ deyə o yekunlaşdırıb.

Eyni zamanda ABŞ lideri Vaşinqtonun vəziyyətin nizamlanması üzrə danışıqlarda müəyyən uğurlar əldə etdiyini qeyd edib və tezliklə yaxşı təkliflər alacaqlarına ümid etdiyini bildirib. D.Tramp V.Zelenskinin Ukraynanın avropalı tərəfdaşların maliyyə dəstəyi ilə ABŞ-dən 15 milyard dollara 10 "Patriot" Hava Hücumundan Müdafiə sistemi almağa hazır olması ilə bağlı son bəyanatını da şərh edib.

"Baxın, müharibəyə başlayanda bilməlisən ki, qalib gələ bilərsən, elə deyilmi? Sən özündən 20 dəfə böyük birinə qarşı müharibəyə başlayırsan və insanların sənə raketlər verəcəyinə ümid edirsən", ‒ deyə siyasətçi bildirib.