Trampa sui-qəsd cəhdi ilə bağlı istintaqın nəticələri

“ABŞ Prezidenti Donald Trampa sui-qəsd cəhdində ittiham olunan Tomas Metyu Kruks təkbaşına hərəkət edib”.

Bu barədə Federal Təhqiqat Bürosunun direktoru Keş Patel “X” sosial media platformasında məlumat verib.

“480-dən çox Federal Təhqiqat Bürosu agenti tərəfindən aparılan araşdırma müəyyən edib ki, Kruks həm onlayn, həm də real həyatda məhdud əlaqələrə malik olub, hücumu tək planlaşdırıb və həyata keçirib, niyyətini heç kimə açıqlamayıb”, – deyə agentliyin direktoru yazıb.

Patel əlavə edib ki, təhqiqat çərçivəsində agentlər 1000-dən çox müsahibə aparıb, 500 000-ə yaxın rəqəmsal faylı nəzərdən keçirib, əldə edilən 13 cihazdan məlumatları və yüzlərlə saatlıq videonu təhlil edərək bu nəticəyə gəliblər.

Qeyd edək ki, 2024-cü il iyulun 13-də Pensilvaniyada gələcək prezidentin seçicilər qarşısında çıxışı silah səsləri ilə kəsilib. 20 yaşlı Tomas Metyu Kruks təhlükəsizlik tədbirləri görülən sahənin xaricindəki binanın damından atəş açıb. Güllələrdən biri Trampın qulağına dəysə də, ABŞ Məxfi Xidmətinin agentləri vaxtında hərəkətə keçərək onu qoruya biliblər.