Trampdan Davosda son qoyulan müharibələrlə bağlı açıqlama - Baku TV

“Son bir il ərzində, prezident seçilməyimdən bu günə qədər bir sıra mühüm ticarət sazişləri imzalanıb və dünya daha təhlükəsiz mərhələyə qədəm qoyub”.

Bu sözləri ABŞ Prezidenti Donald Tramp Davosda “Sülh Şurasının Nizamnaməsi” sənədinin imzalanma mərasimində çıxışında deyib.

Onun sözlərinə görə, illərlə davam edən və artıq unudulmuş kimi görünən münaqişələrə son qoyulub: “9 ay ərzində 8 müharibəyə son qoyulub. Bəziləri 32, 35, hətta 37 il davam edən müharibələr idi və biz onlara son qoyduq”.

Donald Tramp bildirib ki, xüsusilə nüvə silahına malik ölkələr arasında müharibələrin dayandırılması dünya üçün ciddi təhlükələrin qarşısını alıb:

“Pakistan və Hindistan arasında müharibəyə son qoyuldu. Pakistanın Baş naziri etiraf etdi ki, əgər bu baş verməsəydi, 10-20 milyon insan həyatını itirə bilərdi”.

O qeyd edib ki, qısa müddət ərzində bir sıra digər münaqişələrin də həllinə nail olunub: “Kamboca və Tailand, Kosovo və Serbiya, Konqo Demokratik Respublikası və Ruanda arasında gərginliklər aradan qaldırılıb. İsrail və İran, Misir və Efiopiya məsələləri üzərində isə işlər davam edir”.