Trampdan İranla bağlı təcili tapşırıq | “Makron səhv bilir, məsələ daha ciddidir!”

“Fransa Prezidenti Emmanuel Makron yenə hər şeyi səhv başa düşüb”.

ABŞ Prezidenti Donald Tramp bunu “Truth Social” şəbəkəsində yazıb.

“Diqqət çəkməyə çalışan şəxs səhvən bildirib ki, mən İsrail və İran arasında atəşkəsə nail olmaq üçün G7 sammitini tərk edib Vaşinqtona qayıtmışam. Bu, doğru deyil. O, mənim Vaşinqtona niyə getdiyimi bilmir, amma bunun, əlbəttə ki, atəşkəslə heç bir əlaqəsi yoxdur. Məsələ daha ciddidir. Emmanuel həmişə hər şeyi səhv başa düşür”, – Tramp deyib.

Qeyd edək ki, daha əvvəl verilən məlumatlarda bildirilib ki, G7 sammitində iştirak etmək üçün Kanadada olan ABŞ-nin dövlət katibi Marko Rubio da vaxtından əvvəl ABŞ-yə qayıdacaq. Bununla yanaşı, Donald Tramp İran rəsmiləri ilə tez bir zamanda görüş keçirmək barədə öz administrasiyasına göstəriş verib. O, İranın İsraillə münaqişənin diplomatik yollarla həllində maraqlı olub-olmadığını öyrənməyə çalışır.