Trampın qərarı Melonini özündən çıxardı | Əlimizdən gələni edəcəyik ki...

İtaliya Baş naziri Corciya Meloni ABŞ Prezidenti Donald Trampın yeni tariflər tətbiq etməsindən sonra Amerika liderinin bu addımlarına diqqət çəkmək üçün bu gün planlaşdırılan tədbirlərdə iştirakını ləğv edib.

Bu barədə İtaliya Baş nazirinin ofisinin bəyanatında bildirilib.

C.Meloni bu gün Kalabriya əyalətinin Vibo Valentiya şəhərində yeni polis bölməsinin açılışında iştirak etməli idi. Amma o bu tədbirdə iştirak etməyəcək.

İtaliya Baş naziri D.Trampın Avropa İttifaqı (Aİ) ölkələrindən idxal olunan mallara 20 faizlik rüsum da daxil olmaqla bir sıra kəskin tarifləri elan etməsindən sonra onu tənqid edib və ticarət müharibəsinin qarşısını almaq üçün razılaşma üzərində işləməyə davam edəcəklərini söyləyib.

“ABŞ-nin Avropa İttifaqına qarşı tariflər tətbiq etməsi səhv hesab etdiyim bir tədbirdir, bu, tərəflərdən heç birinə fayda vermir. Biz Qərbi digər qlobal oyunçuların xeyrinə qaçılmaz şəkildə zəiflədəcək ticarət müharibəsinin qarşısını almaq üçün ABŞ ilə razılığa gəlməkdən ötrü əlimizdən gələni edəcəyik”, ‒ C.Meloni vurğulayıb.