Türk avtomobil sənayesinin brilyantı

Dünyanın hərb, qida, geyim, turizm və bir sıra sanaye növlərində öz yerini möhkəmlədən Türkiyə avtomobil istehsalçıları sırasında da bir fırtına kimi irəlilədi.

Düzdür, Türkiyə uzun illərdir avtomobil istehsal edir. Hələ 50-ci illərdən başlayaraq qardaş ölkədə qurulan avtomobil industriyası onun adının Avropanın 15 ən böyük avtoistehsalçısının olduğu siyahıya kimi gətirib çıxarıb. Lakin 13 zavodun, demək olar ki, hamısı dünya şöhrətli avtobrendlərlə birgə yaradılmış müəssisələrdir. Yəni avtomobillər Türkiyədə istehsal olunsa da, onları təmiz türk avtomobili adlandırmaq mümkün deyil.

Lakin son 20 ildə Türkiyə iqtisadiyyatının bütün sahələrində ciddi sıçrayışa nail olan Prezident Rəcəb Təyyib Ərdoğan avtomobil istehsalı sahəsində də ölkəsinin kimdənsə asılı olmamasını və öz sözünü deməyi qarşısına məqsəd qoymuşdu.

90-cı illərin sonlarında Türkiyədə istehsal olunan avtomobilləri bu gün Cenevrə avtosalonunun brilyantına çevriləcək bir “Togg” avtomobili ilə müqayisə etmək olarmı? Əlbəttə ki, xeyr.

Üstəlik, “Togg”un xəyaldan gerçəkliyə çevrilməsi cəmi iki il çəkdi. Hansısa sahələr üçün bu, uzun müddət ola bilər, lakin avtomobil istehsalı üçün iki il bir göz qırpımı deməkdir.