Türkiyə ilə Ermənistan arasında energetika məsələləri müzakirə edilib

Türkiyənin enerji və təbii sərvətlər naziri Alparslan Bayraktar Parisdə Ermənistanın Baş naziri Nikol Paşinyan və erməni həmkarı Davit Xudatyanla görüşüb.

Bayraktar bu barədə "X" sosial media hesabındakı paylaşımında bildirib.

Nazir qeyd edib ki, söhbət zamanı bölgədə davamlı sülh və sabitliyə töhfə verəcək addımlar müzakirə olunub. "İnfrastruktur və enerji məsələləri ətrafında da fikir mübadiləsi apardıq. Bu çərçivədə başda elektrik, nüvə enerjisi və təbii qaz olmaqla, birgə fəaliyyət sahələrini müzakirə etdik", – deyə Alparslan Bayraktar bildirib.

Fransada səfərdə olan Ermənistanın Baş naziri Nikol Paşinyan Prezident Emmanuel Makronla da görüşüb. Bu barədə Ermənistan Baş nazirinin dəftərxanası məlumat yayıb.

Məlumata əsasən, həmsöhbətlər Ermənistan-Fransa münasibətlərini müzakirə ediblər. Xüsusilə siyasi dialoqun dərinləşdirilməsi, iqtisadiyyat və infrastruktur sahələrində birgə proqramların həyata keçirilməsi ilə bağlı məsələlər ətrafında fikir mübadiləsi aparılıb.

Tərəflər həmçinin regional hadisələri müzakirə edib, regionda sülh və sabitliyin möhkəmləndirilməsinə yönəlmiş ardıcıl səylərin davam etdirilməsinin vacibliyini vurğulayıblar.