Türkiyədə güclü zəlzələ baş verib | Ərdoğan zəlzələ ilə bağlı açıqlama verdi

Türkiyənin Balıkesir vilayətində 6,1 bal gücündə zəlzələ baş verib.

Ölkənin Təbii Fəlakət və Fövqəladə Halların İdarə Olunması Baş İdarəsindən yayılan açıqlamaya əsasən, yeraltı təkanların episentri Balıkesirin Sındırqı rayonudur.

Gecə saatlarında baş verən zəlzələ başda İstanbul və Çanaqqala olmaqla, Tekirdağ, Bursa, İzmir, Manisa kimi bir çox vilayətdə hiss edilib. Yeraltı təkanlar əhali arasında təşvişə səbəb olub.

Türkiyənin daxili işlər naziri Ali Yerlikayanın ilkin açıqlamasında zəlzələdə insan tələfatının olmadığı, əvvəlki zəlzələdə zərər görən 3 ev və 2 mərtəbəli bir mağazanın dağıldığı bildirilib.

AFAD-dan verilən məlumata əsasən, Türkiyənin Balıkesir vilayətinin Sındırqı rayonunda meydana gələn zəlzələnin ocağı yerin 5,99 kilometr dərinliyindədir.

Təbiət hadisəsi ilə bağlı Türkiyə Prezidenti Rəcəb Tayyib Ərdoğan açıqlama verib.

“Balıkesirin Sındırqı rayonunda baş verən və ətraf əyalətlərdə də hiss olunan zəlzələnin təsirindən təşvişə düşən vətəndaşlarımıza keçmiş olsun deyirəm. AFAD başda olmaqla, əlaqədar dövlət orqanları ərazilərdə təftiş və nəzarətlərini həssaslıqla davam etdirirlər, prosesi yaxından izləyirik”, ‒ deyə dövlət başçısı bildirib.