Türkiyənin bu vilayətində aşkarlanan yazıların detalları | 2800 il yaşı olan abidə

Qədim ikidilli yazılar UNESCO-nun “Dünyanın Yaddaşı” Reyestrinə salınıb.

Türkiyənin cənubundakı Osmaniyə vilayətində yerləşən Karatepe-Aslantaş Açıq Hava Muzeyində saxlanılan yazıların 2800 il əvvələ aid olduğu bildirilir. Qədim Kilikiyaya aid olan bu yazılar Anadolunun heroqlifləri və Finikiya dili ilə yazılıb.

Karatepe-Aslantaşın arxeologiya dünyasında bu qədər əhəmiyyətli hala gəlməsinin başlıca səbəbi onun ikidilli yazılarıdır. Finikiya və Luvi dillərində yazılmış bu mətnlər qalanın zəngin bəzədilmiş qapılarındakı bazalt stel və relyeflər üzərində yer alır. Bu yazılar həmin dillərdə məlum olan ən uzun ikidilli mətnlər hesab olunur.

Karatepe-Aslantaş yazıları yalnız Hittit dilinin oxunmasında mühüm mərhələ yaratmaqla kifayətlənmir, eyni zamanda Yeni Hittit tarixinin izlərini də yaşadır. Bu yazılar Dəmir Dövründə Şərqi Aralıq dənizi bölgəsindəki sosial və siyasi vəziyyətə unikal bir baxış imkanı yaradır.